இமாச்சலப் பிரதேசத்தின் லாஹௌல்-ஸ்பிதி மாவட்டத்தில் உள்ள கீலாங்கில், நாட்டின் முதல் உயர்மலைச் சுகாதார ஆராய்ச்சி மையத்திற்கு ஒன்றிய சுகாதார அமைச்சர் ஜகத் பிரகாஷ் நட்டா அடிக்கல் நாட்டினார். உயரமான பகுதிகளில் வசிக்கும், பணிபுரியும் மக்கள் குறைந்த ஆக்சிஜன் அளவு மற்றும் கடுங்குளிர் காரணமாகச் சிறப்பு உடல்நல அபாயங்களை எதிர்கொள்கின்றனர். இமயமலைப் பகுதியில் அமையும் இந்த ஆராய்ச்சி மையம், இத்தகைய உடல்நலப் பிரச்சினைகளை ஆய்வு செய்யவும், மலைவாழ் சமூகங்கள் மற்றும் உயர்மலைப் பகுதிகளில் நீண்ட காலம் தங்குவோருக்குச் சிறந்த மருத்துவ சேவையை உருவாக்கவும் உதவும் என எதிர்பார்க்கப்படுகிறது.