உலக சுகாதார அமைப்பு (WHO), CERVAVAC தடுப்பூசிக்கு முன்தகுதி (prequalification) அங்கீகாரம் வழங்கியுள்ளது. இந்த அங்கீகாரத்தைப் பெறும் இந்தியாவில் தயாரிக்கப்பட்ட முதல் நான்கிணை (quadrivalent) மனித பாப்பிலோமா வைரஸ் (HPV) தடுப்பூசி இதுவாகும். நான்கிணைத் தடுப்பூசி இவ்வைரஸின் நான்கு வகைகளுக்கு எதிராகப் பாதுகாப்பு அளிக்கிறது. இந்தியப் பெண்களிடையே அதிகம் காணப்படும் புற்றுநோய்களில் ஒன்றான கருப்பைவாய்ப் புற்றுநோய்க்கு HPV தொற்றே முக்கியக் காரணம். WHO முன்தகுதி, ஒரு தடுப்பூசி தரம், பாதுகாப்பு, செயல்திறன் ஆகியவற்றில் சர்வதேசத் தரத்தைப் பூர்த்தி செய்வதை உறுதி செய்கிறது; இதனால் ஐ.நா. அமைப்புகளும் பிற உலக நாடுகளும் அதனைக் கொள்முதல் செய்ய முடியும். இதன் மூலம் குறைந்த விலை HPV தடுப்பூசி இந்தியாவிலும் வெளிநாடுகளிலும் பரவலாகக் கிடைக்கும் என எதிர்பார்க்கப்படுகிறது.