25 மாநகராட்சிகள், 145 நகராட்சிகள், 479 பேரூராட்சிகளுக்கான பணியாளர்களைத் தேர்வு செய்யும் அதிகாரத்தைத் தமிழ்நாடு அரசுப் பணியாளர் தேர்வாணையத்துக்கு (TNPSC) வழங்கத் தமிழ்நாடு அரசு முடிவு செய்துள்ளது. இதற்காக TNPSC (கூடுதல் பணிகள்) சட்டம், 2022-ஐத் திருத்தும் மசோதா சட்டப்பேரவையில் நிறைவேற்றப்பட்டது. தற்போது நகர்ப்புற உள்ளாட்சி அமைப்புகளுக்கான ஆட்சேர்ப்பு அதிகாரம் நகராட்சி நிர்வாக இயக்ககம், நகராட்சி ஆணையர்கள், உள்ளூர்த் தேர்வுக் குழுக்கள் இடையே பகிரப்பட்டுள்ளது. ஆளுநரின் ஒப்புதல் கிடைத்ததும், சென்னை மாநகராட்சி உட்பட அனைத்து நகர்ப்புற உள்ளாட்சிப் பணியிடங்களும் TNPSC தலைமையிலான பொதுத் தேர்வு முறையின் கீழ் கொண்டுவரப்படும்.