ஓய்வுபெற்ற அரசு ஊழியர்கள், அவர்களது குடும்பத்தினர், பொதுமக்கள் அளிக்கும் மனுக்களைப் பெறுதல், பரிசீலித்தல், தீர்வு செய்தல் ஆகியவற்றுக்கு நிர்ணயிக்கப்பட்ட காலக்கெடுவைக் கண்டிப்பாகப் பின்பற்றுமாறு அனைத்துத் துறைகளுக்கும் அறிவுறுத்தல் வழங்க, தமிழ்நாடு தலைமைச் செயலாளர், மனிதவள மேலாண்மைத் துறைச் செயலாளர் ஆகியோருக்கு சென்னை உயர் நீதிமன்றத்தின் மதுரைக் கிளை உத்தரவிட்டுள்ளது. அரசமைப்பின் 350-வது பிரிவு, ஒவ்வொருவரும் தங்கள் குறைகளைத் தீர்க்க ஒன்றிய அல்லது மாநில அரசின் எந்த அலுவலர் அல்லது அதிகார அமைப்பிடமும், ஒன்றியத்திலோ மாநிலத்திலோ பயன்படுத்தப்படும் எந்த மொழியிலும் மனு அளிக்க உரிமை வழங்குகிறது; எனவே இது அரசமைப்பு உரிமையாகும் என நீதிமன்றம் குறிப்பிட்டது. அரசாணைகள், சுற்றறிக்கைகள், அலுவலகக் கையேடுகள் வாயிலாக நிர்ணயிக்கப்பட்ட காலக்கெடுக்கள், இவ்வுரிமை அர்த்தமுள்ள வகையில் பயன்படுத்தப்பட்டு குறைகள் நியாயமான காலத்துக்குள் தீர்க்கப்படுவதை உறுதி செய்யவே என்றும் கூறியது.