கனிமங்களைச் சுரங்கம் தோண்டுதல், பிரித்தெடுத்தல், தர மேம்பாடு, இறக்குமதி, மதிப்புக் கூட்டல், சந்தைப்படுத்தல், விற்பனை ஆகியவற்றை மேற்கொள்ள, நிறுவனங்கள் சட்டம், 2013-ன் கீழ் புதிய பொதுத்துறை நிறுவனமாக 'தமிழ்நாடு கனிம வள மேம்பாட்டுக் கழகம் லிமிடெட்' அமைக்கப்படும். நவீன டிஜிட்டல் வசதிகளுடன் கூடிய ஒருங்கிணைந்த கட்டளை மற்றும் கட்டுப்பாட்டு மையம் கனிமம் சார்ந்த செயல்பாடுகளை நிகழ்நேரத்தில் கண்காணிக்கும். ஆளில்லா வான்வழி வாகனங்கள் (UAV), செயற்கைக்கோள் தொழில்நுட்பம் மூலம் சட்டவிரோதச் சுரங்கப் பகுதிகளைக் கண்டறியும் கண்காணிப்புப் பிரிவும் அமையும். சுமார் 60 கோடி ஆண்டுகள் பழமையானதாகக் கருதப்படும் குண்டுபெரும்பேடு, வெள்ளரை ஏரிகளில் தாவரப் புதைபடிவப் பூங்கா அமைக்கப்படும். கைவிடப்பட்ட சுரங்கங்கள், குவாரிகளில் பொது-தனியார் கூட்டு (PPP) முறையில் சுரங்கச் சுற்றுலா மையங்களுக்கு விரிவான திட்ட அறிக்கை (DPR) தயாரிக்கப்படும்.