அரசு மருத்துவமனைகளில் ஒருமுறை மட்டுமே பயன்படுத்தும் ஹீமோடயாலிசிஸ் கொள்கையைத் தமிழ்நாடு ஏற்றது

அரசு மருத்துவமனைகளில் டயாலிசிஸ் சிகிச்சை பெறும் நோயாளிகளின் பாதுகாப்பை மேம்படுத்த, ஒருமுறை மட்டுமே பயன்படுத்தும் ஹீமோடயாலிசிஸ் கொள்கையைத் தமிழ்நாடு ஏற்றுக்கொண்டுள்ளது. இதன்படி பொதுச் சுகாதார நிலையங்களில் டயாலைசர்கள் (dialysers) இனி மறுபயன்பாடு செய்யப்படாது. ஒருமுறைப் பயன்பாட்டு டயாலைசர்கள் சிறந்த செயல்திறன், மேம்பட்ட பாதுகாப்பு, குறைந்த தொற்று அபாயம் ஆகிய நன்மைகளைத் தருகின்றன. தெலங்கானா, கர்நாடகா, குஜராத் ஆகிய மாநிலங்கள் ஏற்கெனவே இத்தகைய கொள்கையைப் பின்பற்றுகின்றன. உலக அளவில் அமெரிக்காவில் சுமார் 90%, ஐரோப்பாவில் (கிழக்குப் பகுதிகள் தவிர) 85%, ஆஸ்திரேலியா மற்றும் நியூசிலாந்தில் 98% ஹீமோடயாலிசிஸ் ஒருமுறைப் பயன்பாட்டு டயாலைசர்களிலேயே செய்யப்படுகிறது; ஆனால் இந்தியாவின் அரசுத் துறையில் இன்னும் சுமார் 70–80% சிகிச்சைகள் மறுபயன்பாட்டு டயாலைசர்களில் நடைபெறுகின்றன.