தமிழ்நாட்டின் மாமல்லபுரத்தில் நடைபெற்ற தென் மண்டலக் குழுவின் 31-ஆவது கூட்டத்துக்கு ஒன்றிய உள்துறை அமைச்சர் அமித் ஷா தலைமை தாங்கினார். ஆந்திரப் பிரதேசம், கர்நாடகா, கேரளா, தமிழ்நாடு, தெலங்கானா மாநிலங்களும் புதுச்சேரி, அந்தமான் நிக்கோபார் தீவுகள், லட்சத்தீவு யூனியன் பிரதேசங்களும் இக்குழுவில் உள்ளன. ஒன்றிய அரசுக்கும் தென் மாநிலங்கள், யூனியன் பிரதேசங்களுக்கும் இடையே ஒருங்கிணைப்பு தேவைப்படும் விவகாரங்கள் விவாதிக்கப்பட்டன. மாநில மறுசீரமைப்புச் சட்டம், 1956-இன் பிரிவுகள் 15 முதல் 22 வரையின் கீழ், ஒன்றிய-மாநில மற்றும் மாநிலங்களுக்கு இடையேயான ஒத்துழைப்புக்கான ஆலோசனை அமைப்புகளாக மண்டலக் குழுக்கள் அமைக்கப்பட்டன.